الرسم بالجلتر ..

اعادة تدوير المواد المستهلكة .. زجاجة باربيكان تستطيع تحويلها الى فانوس او اي منظر جمالي بمجرد اضافة بعض الخطوط والالوان

..اضف لمسه جمالية ممبزة لأدواتك المنزلية ..

بطاقة الدعوة لعرس شلهوب..بعد عمر طويل

مكالمة من البرزخ

... حين يرن جرس الهاتف في الصباح فهو كطفل يصرخ في أذنك وأنت نائم , خير اللهم اجعله خير .. رفعت السماعة وانا نصف نائم وتثاءبت وأنا أفتتح المكالمة .. آآآآآلوووووههههاا ه .. رد الطرف الثاني بصوت رجل كبير في السن .. السلام عليكم . الو ,, الوو !! - استجبت له بمزيد من التكاسل , هلا تفضل , مين معي ؟ - انا أبوك , كيف حالك يا ولدي ؟ - هنا انتفضت وصحصحت وعدلت من جلستي , نعم ؟ ابوي ؟ ابوي مين ؟ ابوي مات من يومين ودفناه ! - كيفك وكيف الأولاد ؟ - يبدو ان هذا العجوز لم يسمعني جيداً او أن سمعه تقيل .. انت مين يا حج ؟ - ها , مش سامع ؟ شو بتقول ؟ - بقول : انت مين ؟ وشو بدك ؟ - الله يسلمك , الكل بخير والجماعة بيسلموا عليك .. - أي جماعة يا حج ؟ انت متى طلعت من القبر ؟ - ابو جبر بعدني ما زرتو . - يستر بيتك بلاش مزح , اذا انت محمود وبدك تعمل مقلب فخليها بعد العزا ما يخلص .. - عزا مين ؟؟ حد مات ؟ .. - هنا صرخت كي يسمعني جيداً : انت متأكد انك ابوي ؟؟ - ايوه انا أبوك , شو مالك ؟ مش عارف صوتي ؟ * هنا انتابني شعور انه فعلاً أبي , فأنا رأيت حالات مماثلة في بعض الأفلام , واقتنعت ان الأموات يعودون أو ان أبي حصل على موبايل في الجنة وفكر ان يطمئن على أولاده .. فرغبت بتأكيد الشك : - ايوه يابا .. كيف حالك ؟ - الحمد لله , كل شي تمام .. - كيف الوضع عندك ؟ كيف الجماعة استقبلوك ؟ - ولا أحلى من هيك , كان استقبال حافل , وما قصروا.. - ما شاء الله , طيب كيف شفت الجنة ؟ - شو أوصفلك ؟ مزارع وبساتين وشجر, شوفة الزيتون لحالها بترد الروح .. - طيب التقيت بجدتي ؟ شو أخبارها ؟ - على اعتبار ان جدتي في الجنة _ - لسه ما شفتها , لأنها ساكنة بمنطقة بعيدة شوية ,, بس حكينا معها ورح تيجي الليلة ! - يا حبيبي يابا , والله لك وحشة , كنت مالي علينا البيت .. - طيب يا ولدي طمنني , شو عملتوا بعدي ؟ - خليها على الله يابا .. بعد ما فارقتنا شعرنا البيت مظلم , والكل صار يبكي , وأمي دخلت بغيبوبة ودخلناها المستشفى والبنات ما ناموا , وأنا لسه من ساعتين نمت علشان اقدر أوقف على رجليّ .. - ولك ليش هيك بتعملوا ؟ هو أنا أول مرة أنام برة الدار ؟ - مش أول مرة , لكن حتكون آخر مرة , وما حنشوفك الا في الجنة إنشاء الله .. - ولك شو بتحكي ؟ شو صايرلك بعدي ؟ - بعدك الدنيا انقلبت , والشباب بكرة حيوزعوا الورثة , وربنا يستر .. - ورثة ؟ تورثوني بالحيا ؟ الله يخرب بيتكوا, انا بكرة قاطع زيارتي وراجعلكم .. - يابا بتفكر دخول الحمام مثل خروجه ؟ كيف ترجع ؟ في هناك مواصلات ؟ - رح ارجع على نفس الرحلة , ورح اورجيكوا يا قليلين الترباية !! - يابا ليش عصبت ؟ انت عايش بالجنة ومبسوط , بلاش تنكد على حالك ؟ - انا كنت مبسوط لحد ما سمعت بتقسيم الورثة , وبكرة من الصبح خلي يوسف يستناني بالموقف - يوسف مين بلا مؤاخذة ؟ - يوسف أخوك .. والا خلص بطلتوا تعرفوا بعض ؟؟ - لا يابا بعدنا إخوان , بس ما عندنا أخ اسمه يوسف !! - ياخوفي تكونوا رميتوه في غيابة الجب ! يا خراب بيتك يا ابو يوسف .. - يابا انا بحكي عن جد , ما عندك ولد اسمه يوسف .. سلامة عقلك . - انتم خليتوا فيني عقل ؟ انا بحكيلك وين يوسف ؟ - يابا اقسم لك بالله ما عندنا أخ اسمه يوسف . - انا لله وانا إليه راجعون , طيب وأخوك لبيب ؟ هسه احكيلي ما عندي أخ اسمه لبيب ! - برضو ما في لبيب .. شو صايرلك يا حج ؟ - ولك يقصف عمرك شو لخمة , انت مين طيب ؟ احكيلي انك مش سامح ! - سامح مين ؟ - شايف ؟ انا كنت متأكد انك بتتخوث .. - طيب انت من وين بتحكي ؟ - انا ؟ بحكي من رام الله من بيت أخوك حمدي . - وبالضبط طالب رقم مين ؟ - طالب رقم ابني سامح بمخيم البقعة , انت مش سامح يعني ؟ بتتخوث يا سامح ؟ - حج .. اسمع احكي لك , انت غلطان بالرقم وانا مش سامح ولا ساكن بالبقعة وملعون ابو التلفون لأبو اللي ركبوه . وحل عني لأني دافن ابوي امبارح ولحد هسه ما نمت ..

الطب بين الماضي والحاضر

.. في حملة شاملة لصيانة اسناني قبل الزواج بدأت بمشروع خلع وحشي وتنظيف كل ما يحتويه فمي من اشياء بما في ذلك لساني ( تنظيف لساني من الشوائب والكلمات العالقة) .وقد انتهيت من تمهيد المرحلة الاولى المتعلقة بالحشي والتنظيف وبدأنا اليوم بالشغل الثقيل ..خلع طاحونة العقل التي شعرت بدماغي يخرج معها ..آآآآآآآآآآآآآخ يابا .. لم تكن العملية سهلة ..محاولات شاقة من قبل الدكتورة بإستخدام العتلة والزرادية وادوات صناعية اخرى .. وانا ارزخ تحت وطئة البنج تذكرت حادثة صغيرة كانت في الماضي .. كان لي عم –الله يرحمه- يعتبر الطبيب الشعبي الوحيد بالمنطقة .. كان يعالج الكسور ويخلع الاسنان ويطهر الاولاد ويذبح الارانب وله مآرب اخرى .. آلمني سني فلم اتردد بالتوجه اليه وكانت المرة الاولى(والاخيرة) .. كان يرحمه الله لا يحتمل نقاش ولا يحب الدلع ..وبمجرد ان يمسك بالضرس فيجب ان يخلعه مهما كلفه الامر من جهد واحتمال صرخات المريض .. فتحت فمي وأشرت له بالداخل .( سني هذا بيوجعني) .. فأمسك بالزراديّة وامرني ان افتح فمي وان ازيح يدي نهائياً ..وصدر منه امر ان لا اتحرك لأي سبب .. لم يكن البنج مكتشفاً بالنسبة له .. كانت الزرادية صدئة – استخدمها في قص الاسلاك قبل يومين- .. وضع الزرادية على اول ضرس تمكن من امساكه وبدأ بالخلخلة ..وأنا اصرخ وأتفجر الماً .. وكلما حاولت رفع يدي كان ينظر لي شزراً وينزلها .. الى ان حرك الضرس من مكانه وبدأ دمي يسيل واختلط بدموعي .. وبحركة عنيفة نزع الضرس من مكانه وقمت انا هارباً وانا اصرخ وأشتم ذلك العم العطوف .. فقد ادركت انه قد خلع ضرساً سليما بدل ذلك التالف .. الله يرحمه ..

الحرق على الجلد

فن الرسم والكتابة على الجلد الطبيعي .. باستخدام ادوات الحرق الكهربائية