الصوص ابو الشلن

من صغري وانا نفسي اربي بس او ارنب او حتى عصفور.. وكنت اترجى امي وابوي احكيلهم اشترولي خروف والا حاجة اربيها ..ابوي يقوللي : مش لما تربي حالك الاول ؟ المهم ..الفكرة ظلت براسي ..لحد ما اجا اليوم الموعود .. واحد بيبيع كتاكيت ( صيصان) دخل حارتنا .. قمت انا عالسريع ولحقت البكم .. عمو بقديش الصوص؟ حكالي بشلن ..لكن يا خسارة مامعي ولا شلن .. طيب عمو ما في خيارات ؟؟ حكالي : احنا بنشتري شباشب بلاستك قديمة وكل شبشب بصوص .. روح جيب أي حاجة وانا اعطيك صوص .. ما صدقت ..رحت طلعت عالسطح ..لقيت مجموعة شباشب بلاستيك اللي كان اخوي يرميها عليّ لما اهرب عالسطح.....كل شبشب بصوص ..ولقيت بسطار جيش قلت اعطيه اياه يمكن يجيب ديك .. ورحت نازل ركاض ..عمو خذ واعطيني عشر صيصان وديك .. اعطاني 11 صوص لأنه ما في ديوك .. حملتهم بكرتونة ورحت علشان اقعد اربيهم .. بعد ساعة ونص بالضبط ..مات 3 منهم بأسباب مجهولة ..يكون واقف ..الاقيه صار يتمايل ..بعد شوية يضرب كوع وينام نومة ستي اللي نامت ما قامت .. بعد كمان ساعتين ..رجعت لقيت 2 غرقانين بصحن المي ..وبما انهم ما تعلموا سباحة راحت بكيسهم .. باقي 6 ..قلت اطلعهم من الكرتونة يشوفوا الشمس خليهم ينعنشوا ..فعلاً صاروا يركضوا ويلاحقوا ورى الذبان والنمل .. لكن فقدت كمان واحد بحادث دهس .. اخوي دعس عليه عن غير قصد .. قلت ما في غير ارجعهم عالكرتونة لأن المغرب رح يأذن ولازم انام .. ثاني يوم .. صحيت لقيت الكرتونة مفتوحة واللي فيها رايح ..جاي قط جوعان ..وفاتح الكرتونة وعامل حفلة تشرّد .. طبعاً قضيت يومي ابكي ..مش حزن على الكتاكيت ..ولا على الخسائر ..ولا اني ما حققت امنيتي ..بس لأن امي اكتشفت النقص في اعداد الشباشب ..ولا وحدة فردتها معها .