الاثنين، 6 أبريل 2009

يرحم جدك ..ويرحم جدي

يرحم جدك اللي كان مفكر ابو ظبي زلمه
يرحم جدك كان ياكل النيفيا يفكرها لبنة
يرحم جدك كان يتمرّى بغطاية علبة السمنة
يرحم جدك كان يرمي عبايته ترجعله مشي من كثر القمل فيها
يرحم جدك كان يلحس الزفتة يحكي مال الدبس مِطعِم ؟
يرحم جدك اللي كان يفكر ام أذينة رقاصه
يرحم جدك اللي كان يتهاوش مع الحمار على قشر البطيخ
يرحم جدك لما كان يفكر السنيوره لزقات ظهر
يرحم جدك كان مفكر الباميا طلاق مسدس
يرحم جدك كان بس يلعب شطرنج ما يرضى يقتل أي جندي إلا ليتأكد انو يهودي
وأخيرا .. يرحم جدك .. كان يحرق اصابعه علشان يشم ريحة اللحم
عبارات انتشرت في مجتمعنا بشدة كأي عبارات يطلقها ممثل او مغني او اي شخص آخر
قد يكون لبعضها مدلولات.. وقد لا تتجاوز بعضها حد المسخرة والاستهزاء ..
هنا يقصد المتكلم بذكر عبارة ( يرحم جدك ) ان كل ما انت عليه الآن من تطور يجب ان لا
يجعلك تنسلى ما كان عليه اجدادك من فقر وقلة حيلة ..
لكن والله اعلم ..ان الجيل الذي نتمسخر عليه ..اجدادنا ..كانوا افضل من حالنا بدرجات
فبغيابهم غابت البركة من الأرض .. وانقطعت السبل وتفرقت الجماعات ..
الله ارحم اجدادنا وآبائنا .. واغفر لنا ولهم ..

هناك 6 تعليقات:

sfo يقول...

شو بكره هالجملة
مليح إللي ما حد عنا بالعيلة بحكيها

أنا بحسها مسبة أو تصغير

shalhoob يقول...

الله يرحم جدك ..
قصدي الله يرحم جدي وجدك وكل اموات المسلمين
انا كنت احكيها من باب المزاح .. ومن باب اني بحب الامثال الشعبية ..وهالعبارة قريبة من المثل القائل :
من وين يجيك الزين وامك خدامة وابوك عبد مشقحه شلاطفه ..
اذا عندك امثال اقوى اتحفنا يا مختار ..
وحياك الله يا سيدي

Em Ommar يقول...

بحس الناس اللي بتحكي هيك بتكون غيرانه ومكيوده من الوضع اللي وصله الشخص المعني ف الدعوه

او انه نفسه يصير زيه ومش غادر
انداري

shalhoob يقول...

ولا غيرة ولا ما يحزنون
بس انا صرت استعملها علشان اذكر اللي قبالي بماضي اجداده العريق ..لأني ما بحب الناس اللي بتحاول تمسح تاريخها , ما بحب اللي بيتخلى عن اصله وما بحب اللي بيتمدن وهو عارف حاله بدوي ..
ومثل ما قال المثل ..
الفلاح فلاح ..بيدرع ثوم لو اكل تفاح
وسلامتك

sfo يقول...

هو المعنى برجع للشخص وطريقته بقولها
بس بشكل عام أنا ما بحب أحكيها

shalhoob يقول...

طيب ياكبير
لا تحكيها .. وانا بحاول اخفف منها